Estar-se estando

Antis-mas, os mesaches y zagales,
cutio i yera-nos en as boiras,
mos diziban os nuestros lolos,
¡y que ragón teneban!

Yera de raso berdá,
pero a nuestra boira,
mos dixaba beyer y pensar,
riconoxer a prexonas y amigos,
y profes, que a pais y chirmáns.
Y más que más, ser nusatros mesmos,
y no estar dirichidos per una maquineta.

Güei os nuestros fillos,
ya no se’n puyan tas boiras,
perque cal prexinar, y beyer más que más a l’atrocostau,
y parixe, como si no ne abesén boluntá ta nadar por as mars d’o zielo.

¡Que suerte que i teneba-nos
as prexonas d’a miya edá y bolada!

Dende as boiras creigo que se beyaba millor o mundo,
y creigo que con ixa ambiesta,
podebamos adebantar-nos-ne una mica,
a l’esdebenidero.

Güei es zagales son todos penchaus tamién,
pero ne son d’atra traza,
con as tablet u movils,
en d’o les biene todo feito,
y lis ne amuestran,
como s’han de bestir,
lo que han de minchar,
como han de charrar,
que parolas emplegar,
y asinas dica l’infinito.

No ne son en as boiras u nubes,
alufrando y prexinando per eros mesmos garra cosa,
en son, con a nube d’o mobil,
que ye o suyo amo u ama como gose dizir-se.

Que poliu puyar tas boiras,
y estar-se estando,
alufrando o mundo, pexinando,
y abegadas, adebantar-se a lo futuro,
perque dende o zielo todo se puede alufrar y beyer.

De cuan en bet,
ye muito intresán,
nadar en colichotis per as boiras,
y estar-se estando,
ye salúta l’alma.