Condenaus ta cutio

Una figuera chicorrona,
que fa felit a nuestros güellos,
pero prexino, que era no i será tan goyosa como nusatros.
O beyer-se engarcholada en un tiesto,
sin aber dengún dreito a crexer y morir,
ha d’estar una tortura ta iste ser bibo.
Pienso que si a nusatros os omes,
dende que i semos naxius,
mos ne ficasen e n’un plato ducha,
agafaus de piet y máns,
con un teito n’alto,
ta no dixar-nos crexer,
como seres bibos que i semos,
chilaria-mos plenos de dulors,
clamarisa-mos a ra muerte,
sí, muito e n’antis de bibir asinas.
Os umáns semos egoistas por naturaleza,
y mos creyemos reis d’o mundo, y d’a bida,
y nó, no abemos dreito,
solo que a bibir como a resta de seres bibos rispetando os regles naturals.
Abegadas semos tan apatuscos,
que ni conoxemos,
u no queremos conoxer,
mos bufa ra pocha.
Si os seres umáns abemos un chuez,
que cutio mos chuzgue en l’atro mundo,
por lo feito en iste,
i seremos todos u cuasi condenaus, ta cutio.