Cables a rafe d’o sulero

Buena tardi GaRzeta, y busatros GaRzeters.

As eleutricas un rompetozuelos, difizil d’entender.

Isto amigos, biene a cuento de que ya lebo a lo menos un més, que soi beyendo cutio,
como un trallo que ha es cables d’una linea d’eleutricas, con tres filos rezios, ye cayiu n’un ribazo, y, u no lo beye naidie, con o periglo que ha, u, lis-ne bufa ra pocha a totz, prexonas, elutricas, y lo Conzello.

Ayer tardi o ne torné a beyer , como fan ya muitos diyas, o trallo n’o sulero y es cables a mán de animals u prexonas.

Iste maitįn he trucau a lo Conzello de Borja, perque o Santuario d’a Misericordia ye de Borxa,
ye de Borxa, ta dizir-lis-ne, y albertir d’o periglo que hán es cables que són cuasi a rafe d’o sulero.

En O Conzello m’hán dito que.. «Isto no ye cosa de nusatros».
¡¡Abra de gritar busté a eleutricas!!

Truco a eleutricas, ta dizir-lis-ne.
Dimpues de una cuartalada (un cuarto de hora) me’n dizen que ye Malaga,
que he de clamar t’atro telefón.

Torno a trucar a o nuebo lumero, y me sale una mosica, y un mensache que me dit que en un inte m’atienden, asinas a lo menos media gora, u más, aguardando que beluno me pille o telefón.

A la fín lo me pillan y me surte una mesacha no espanyola , con un azento rarizo, y me dit que ye Madrí, he precurau esplicote-ne una mica, y ha estau cuasi imposible d’entender-nos-ne,
yo precuraba dizir-le o poblema.. que cualsiquier puede morir eleutrocutau.

Como he beyiu que cuasi yera imposible, entender-nos-ne, y ya todo
encarrañau con istas interpresas especulatibas y poco publicas,
lis ne he nimbiau a muyir cardelias (los he mandau a cascarla) y he penchau.

Puestar que tiengamos bel sorronte si beluno,
ne pilla es cables con as máns.